第二朝一天清早起身
第一件事攞車，開始千葉縣自駕之旅
平時唔會揸呢啲得意款
所以特登租嚟玩吓
臨走影吓我哋間酒店
呢間 Richmond Hotel 響火車站對面街
旺中帶靜，而且價錢一啲都唔貴
平均六七百蚊一晚
好！準備出發！
第一日嘅行程由成田巿出發
去到房總半島西邊嘅Mother Farm マザー牧場
唔好信Google Map
唔塞車車程都起碼要用兩個半鐘
好彩天氣好好，望住咁靚嘅天空，啲時間都易過啲
間中仲會見到啲未謝嘅櫻花樹
果種鮮粉紅色真係好養眼
小港女就坐響佢個私家Baby Seat度
一路扮揸車
到達Mother Farm 
到埗後第一件事
就係參考活動時間去安排行程
同埋訂定Bus Tour
日本嘅春天天氣好舒服
好多人嚟到農場唔係為咗趕行程
只係一家大細灘響個草地度
離遠見到棵粉紅色嘅樹
以為仲有未謝嘅櫻花
不過就算唔係櫻花又有咩所謂
反正個環境同樣咁靚
第一站節目就係睇牧羊犬撚羊
大人可能會覺得無聊
不過細路就覺得好過癮
外面有幾隻羊仔可以餵食
餐廳位於入口五分鐘步程
外面有好多戶外座位
不過我都係鐘意坐佢個窗口位
窗外個景色係咁
淨係食個景都夠
我哋點咗佢最Signature 嘅草泥馬咖哩飯
味道還可以
雖然係咖哩，但係連少少辣都冇
小朋友可以放心食用
飯後休息一陣，我哋就出發參加農場個Tour
其實一開始我都懷疑自己柒咗
做乜春要再加錢去搵人帶自己行農場
當我問清楚原來個 Tour 係「體驗團」
當堂覺得物有所值
Shuttle Bus 會帶參加者去馬路嘅另一邊
嚟到一間好骨子嘅藍色屋仔
我哋參觀農場嘅「巴士」
就泊響屋企嘅另一邊
導遊會揸住呢架開放式嘅車仔
直接穿過住滿農莊動物嘅農舍
變相連隻腳都唔須要踩落地
就可以見到農場裡面嘅環境
參觀列車載住乘客去到座小山丘
響附近散緊步嘅綿羊仔
就好醒目咁知道有班茂利會走嚟餵嘢食
紛紛從四面八方走過嚟
啲羊完全唔驚人
（相反啲大人仲驚到嘈嘈閉）
只要你伸出手
班蠢羊就會以為你有嘢食
然後懶可愛咁走埋嚟
熱情咁同你對手打個車輪
直至你擺出一副窮撚模樣
張開雙手示意裡面乜嘢都冇
佢哋就會去搵過第二個老細
啲羊個樣真係勁蠢
除咗可以「零距離」餵羊仔
響欄杆後面，仲有一班草泥馬等緊我哋寵幸
可能因為佢哋比較大隻
容易不自覺咁撞到遊客
幾隻草泥馬都畀人困響隔籬局域
眼白白睇住羊咩咩食哂遊客啲乾糧
小港女自告奮勇
去餵隻比佢高一倍嘅龐然大物
草泥馬啲表情好似人
成日擺出一臉不耐煩嘅衰樣
又時又會突然打乞痴
一個唔小心隨時畀佢噴到一面都係口水
呢隻個樣特別衰
直頭想打鑊佢
設計對白：「你大我啊！」
沿途仲會見到幾隻牛呀、馬呀
隻隻都生到肥屍大隻
其實都幾羨慕佢哋
投啱胎嚟咗日本，做牛做馬都舒服過港豬
臨結束呢個零距離餵羊體驗團之前
響上車嘅小屋，嘆番杯新鮮熱牛奶
農場最新鮮嘅牛奶
味道反而係冇紙包牛奶咁香滑
更加冇香港某大品牌咁「杰」
如果響香港飲到咁嘅牛奶
我甚至會懷疑佢係咪溝咗水:o)
定係甚實香港飲開啲奶
畀人偷偷加咗料變「濃」咗呢？
指定動作：影完當買咗！
（唔準買！屋企已經成張床都係公仔喇！）
雖然話係「農場」
但係園內啲花草都打理得好靚
甚至媲美好多好出名嘅公園
接住落嚟我哋去咗園區另一邊
果度可以親手接觸另一啲小動物
好大隻嘅陸龜
肥兔仔
仲有呢隻個樣呆到爆嘅水豚
大大小小嘅動物響你身邊自由咁走嚟走去
果個感覺好搞笑
由於車程都唔短
我哋響太陽仲未落山嘅時候早啲起行
不過回程嘅路超級太塞車
我由五點揸到八點幾
足足要三個幾鐘先番到成田巿
（如果由東京直接過嚟，回程起碼要揸多一個鐘 ）
全程高速公路
冇得休息
個屎忽都坐到就嚟爆
留言列表
東京 (0)
